24 گھنٹوں میں 3 ڈرون حملے، 3 درجن سے زائد اموات
کرم ایجنسی میں پاک افغان سرحد کے قریب انجرگی زنڈو نامی علاقے میں امریکی جاسوس طیارے نے ایک گھر پر دو میزائل داغے جو کہ گزشتہ 24 گھنٹوں کے دوران ہونے والا تیسرا ڈرون حملہ ہے ۔
ذرائع کے مطابق انجرگی میں کالعدم ٹی ٹی پی ،جماعت الاحرار اور حقانی نیٹ ورک کے ٹھکانوں پر حملہ کیا گیا جس میں 9 افراد کی ہلاکت اور 5افراد کے زخمی ہونے کی اطلاعات ہیں۔
اس سے قبل آج صبح پاک-افغان سرحدی علاقے میں بھی ایک ڈرون کیا گیا جس میں کمانڈر ابوبکر کے 7 ساتھی ہلاک جب کہ 3 زخمی ہوئے تھے۔
ذرائع کا کہنا ہےکہ خرلاچی کے علاقے کچ خرم میں جاسوس طیارے سے 2 میزائل فائر کیے گئے جس کے بعد علاقے سے دھوئیں کے بادل بھی اٹھتے دیکھے گئے ہیں جب کہ علاقے میں ڈرون طیاروں کی نچلی پروازیں بھی جاری رہیں۔
یاد رہے کہ گزشتہ روز بھی افغان سرحدی علاقے میں امریکا نے ڈرون حملہ کیا تھا جس میں 20 افراد ہلاک اور 10 زخمی ہوئے تھے۔
