آپریشن راہ نجات کا بقیہ حصہ، جنوبی وزیرستان سے 200 خاندان بکاخیل کیمپ منتقل
سکیورٹی فورسز نے جنوبی وزیرستان ایجنسی کے علاقہ شکتوئی میں دہشت گردوں کے خلاف آپریشن کا آغاز کردیا ہے جس کے باعث 200 سے زائد خاندان محفوظ مقامات کی جانب نقل مکانی کرگئے ہیں۔
تحصیل لدھا کے علاقہ شکتوئی کے مقامی افراد کے مطابق سال 2009 کے دوران جنوبی وزیستان میں دہشت گردوں کے خلاف آپریشن راہ نجات شروع کیا گیا تھا تاہم 50 ہزار آبادی پر مشتمل اس علاقے (شکتوئی) کو کلیئر نہیں کیا گیا تھا جس کے باعث اب اس علاقے میں آپریشن شروع کیا گیا ہے۔
فاٹا ڈیزاسٹر منیجمنٹ اتھارٹی (ایف ڈی ایم اے) کا کہنا ہے متاثرہ خاندانوں کو شمالی وزیرستان کے بکا خیل کیمپ منتقل کردیا گیا ہے۔
یاد رہے کہ آپریشن راہ نجات کے باعث 1 لاکھ 50 ہزار خاندان بے گھر ہوئے تھے جن میں زیادہ تر واپس اپنے علاقوں کو چلے گئے ہیں۔
