خوف اور فساد کا دور اپنے اختتام کو پہنچا، ماضی کے مقابلے میں مہنگائی کم ہو رہی ہے، نوازشریف
??????????????????????????????????????????????????????????????????????????????????????????????????????????????????????????????????????????
وزیراعظم محمد نواز شریف نے کہا ہے کہ خوف اور فساد کا دور اپنے اختتام کو پہنچا، آج ایک نیا دور شروع ہو رہا ہے، اندھیرے دور ہو رہے ہیں، ترقی کا پہیہ چل پڑا ہے، ماضی کے مقابلے میں مہنگائی کم ہو رہی ہے، لوڈ شیڈنگ تین چار گھنٹوں تک محدود ہو گئی ہے، صنعتوں کو 24 گھنٹے بجلی مل رہی ہے، بجلی کی قیمت کم ہوئی ہے، ملک بھر میں موٹر ویز اور سڑکوں کا جال بچھ رہا ہے، ایک ہزار ارب روپے سے زائد کے سڑکوں کے منصوبے بن رہے ہیں۔ فاٹا میں جامعات اور تعلیمی ادارے بنیں گے، سڑکیں اور انفراسٹرکچر تعمیر ہوگا، فاٹا کو قومی دھارے میں لایا جائے گا، ایف سی آر کا خاتمہ کر کے نئی قانون سازی کی جائے گی، ہمیں محاذ آرائی، منفی اور فرسودہ سیاست سے نجات حاصل کرنا ہوگی اور دل بڑا کر کے چھوٹے چھوٹے مفادات سے باہر نکل کر ترقی کے لئے ہاتھوں میں ہاتھ ڈالنا ہوں گے۔ جمعہ کو کرم تنگی ڈیم کے افتتاح کے موقع پر تقریب سے خطاب کرتے ہوئے وزیراعظم نے کہا کہ آج بہت نیک منصوبے کا آغاز ہو رہا ہے، کرم تنگی ڈیم پراجیکٹ کی بنیاد شمالی وزیرستان میں ایک نئے دور کا آغاز ہے۔ یہ اس بات کا اعلان ہے کہ خوف اور فساد کا ایک دور اپنے اختتام کو پہنچا اور آج ایک نیا عہد شروع ہو رہا ہے۔ آج اﷲ کا شکر ہے کہ زندہ رہنے کی خواہش ایک بار پھر انگڑائیاں لینے لگی ہے، جہاں مایوسی کے اندھیروں کے سوا کچھ نہ تھا وہاں آج امید کے چراغ روشن ہو رہے ہیں، جہاں دہشت گردوں کا قبضہ تھا آج وہاں معاملات یہاں کے عوام کے ہاتھ میں پھر آ رہے ہیں، یہ آسان کام نہیں تھا، اس کے لئے بڑی قربانیاں دینا پڑی ہیں۔ انہوں نے کہا کہ اس دوران بے شمار لوگوں کی جانیں گئیں، ان گنت افراد کو نقل مکانی کا عذاب بھگتنا پڑا اور پاک فوج، پولیس اور سلامتی کے دیگر اداروں کے جوان شہید ہوئے
