ایشیائی بینک کی پاکستان کیلئے 80 کروڑ ڈالر کی منظوری
ایشیائی ترقیاتی بینک (اے ڈی بی) نے پاکستان کو وسطی ایشیاء علاقائی معاشی تعاؤن (سی اے آر ای سی) راہداری سے تجارت کے لئے منسلک کرنے کی خاطر 80 کروڑ ڈالر کی سرمایہ کاری منصوبہ بندی کی منظوری دے دی۔
اے ڈی بی کی جانب سے جاری اعلامیے کے مطابق اس منصوبہ بندی سے پاکستان کو خطے سے منسلک ہونے میں مدد ملے گی اور پاکستان کو سی اے آر ای سی سے ملانے والی 747 کلومیٹر طویل سڑک کی بحالی بھی ہوگی۔
سرمایہ کاری کے پہلے منصوبے کے تحت 18 کروڑ ڈالر رواں سال کے آخر تک ادا کیے جانے کی توقع ہے جس میں سندھ، پنجاب اور خیبرپختونخوا میں سڑکوں کی بہتری بھی شامل ہے۔ دوسری اور تیسری قسط بالترتیب 26 کروڑ اور 36 کروڑ کی ہوگی جس کی تکمیل 2019 اور 2021 تک متوقع ہے۔
اعلامیے کے مطابق اےڈی بی کے ٹرانسپورٹ اور مواصلات کے ڈائریکٹر ڈونگ سو پیو کا کہنا ہے کہ ‘وسطی ایشیا، عوامی جمہوریہ چین اور جنوبی ایشیا کے سنگم میں واقع پاکستان کا منفرد جغرافیائی وجود خطے کی گزرگاہ اور تجارتی مرکز بننے کی منفرد صلاحیت رکھتا ہے’۔
ان کا کہنا تھا کہ ‘اس منصوبہ بندی سے پاکستانی حکومت کو اپنی صلاحیت، سی اے آر ای سی راہداری سے منسلک ہونے اور تجارت کی بہتری کے حوالے سے اپنے کردار کو بہتر طور پر سمجھنے میں مدد ملے گی’۔
اے ڈی بی کے مطابق سرمایہ کاری کا یہ پروگرام نیشنل ہائی وے اتھارٹی کومنصوبے کے ہر حصے پر عمل درآمد کے لیے کام کو یقینی بنانے اور صلاحیت کو بہتر کرنے پر بھی توجہ مرکوز کرے گا۔
